Според дописот испратен до матичните лекари, во рок од 15 дена треба да се укине автоматското креирање и резервирање упати преку локалните софтверски решенија. Наместо тоа, термините ќе треба да се закажуваат единствено додека пациентот е присутен во ординацијата и лекарот лично го издава упатот.
Од Управата предупредуваат дека по истекот на рокот ќе следуваат контроли, а доколку некој софтвер и понатаму овозможува автоматско закажување, ќе биде привремено исклучен од системот „Мој термин“ сè додека неправилностите не бидат отстранети.
Одлуката предизвика реакции кај дел од матичните лекари. Докторката Даниела Николовска смета дека укинувањето на автоматското пребарување на слободни термини ќе го зголеми административниот товар и ќе ја отежне организацијата на работата. Таа посочува дека досегашниот систем им помагал навремено да обезбедат термин за пациентите кои биле на листа на чекање.
Од друга страна, директорот на Управата за електронско здравство, Фикрет Шабани, вели дека промените се неопходни бидејќи голем број закажани термини останувале неискористени. Според него, често се случувало пациентите да не бидат известени дека им е резервиран термин, па не се појавувале на преглед, со што се губеле можности за други пациенти.
Новиот начин на работа треба да обезбеди секој закажан термин да биде потврден со пациентот, а слободните места кај специјалистите да се користат поефикасно.