Најновиот израз кој се шири на TikTok и на социјалните мрежи е – полиестер (polyester).
Секако, младите не зборуваат за хемискиот состав на ткаенината, туку овој поим го претворија во нова, сликовита навреда за сè што е вештачко, лажно, генеричко или исценирано.
Кога нешто е „полиестер“?
За милениумците, изразот полиестер е современа верзија на некогаш популарниот збор „basic“, но со многу подлабоко значење.
Фотографија од летување која изгледа спонтано, а всушност е режирана по 50-тиот обид? Полиестер.
Јавна реакција на политичар или инфлуенсер која звучи извештачено и глумено? Полиестер.
Инфлуенсер кој воодушевено фали производ што очигледно никогаш не го користи надвор од платената реклама? Тој е „Polyester Prince“ – „принц на полиестерот“.
Еден од поттикнувачите за експлозијата на овој термин беше вирално видео од 18-годишник кој го опишува својот „совршен живот“: станување во 6 часот наутро во пентхаус во Њујорк, читање Библија со друштвото, органски чај, трчање во Централ парк и AI агенти кои работат наместо него додека тој руча.
Интернетот веднаш го прогласи овој алгоритамски диктиран, површен сон за – полиестерски животен стил.
Зошто токму ткаенина?
Изборот на зборот не е случаен и е тесно поврзан со ставот на новите генерации кон потрошувачкото општество.
Генерацијата Z сè повеќе ги отфрла синтетичките материјали и ултра-брзата мода, па затоа е популарна и фразата „It gives Shein“.
Покрај тоа, полиестерот се разградува стотици години, ослободува микропластика и се смета за симбол на загадувањето. Отфрлањето на оваа ткаенина од гардеробата така се пренесува и во метафорична смисла – како отфрлање на „пластичните“ луѓе.
Терминот полиестер само продолжува низа на вирални изрази како Slop, Industry Plant или Performative Male, кои во суштина произлегуваат од истата потреба – да се разоткрие и прозива секоја форма на неискреност.
Иако постарите генерации често со потсмев гледаат на новиот интернет-жаргон, овој израз всушност открива одредена доза здрав скептицизам кај младите кон лажниот сјај што го гледаме на социјалните мрежи.
Добрата вест? Ако го употребите овој израз во вистински контекст – официјално сте се спасиле од статусот на „Unc“.